Een Museum för de ganze Familie: Dat öllste, eegenständige Schoolmuseum in Düütschland, 1978 van Bodo un Ursel Wacker in een oole Landschool up de Beenen stellt, versteckt sik in Bohlenbergerfeld bi Zetel.

Jung un Old könnt sik bi een Ünnerricht so at 1910 up de oolen Tieden instimmen. Erst gifft dat Schörten för de Deerns un Holschen för de Jungs, dorto ok oole Namen. Ordnung un Ruhe, Stillsitten un Tolustern ward denn van een strenge Schoolmestersche lehrt. Wenn een nich uppassen kann, denn geiht dat up de Schlingelbank.

Achteran könnt de Lütten in een eegen Schoolklass speelen, un de Grooten erinnnert sik bi Kaffee un Koken an ehr eegen Schooltied.Bi Sünnschien sitt de Lüüd gern buten in’n Innenhoff van’t Museum.

Nich verpassen schull man de Utstellung van’t Schoolmester- und Schöler-Leven in’t letzte Jahrhunnert. Dat Museum hett een groot Archiv mit Böker, Wandbiller un veele physikalische Gerätschaften. Up Anmelln kann man dor schnüstern un arbeiten. Up anner Siet van’t Museum wurd 2009 een plattdüütschen Lehrpadd inricht. Dor kann de ganze Familie sik öwer Fauna un Flora schlau maken un so ganz nebenbi de plattdüütschen nams van Vagels un Planten lehren. Veel Pläseer is garanteert!